-->

2.11.17

Actividaes del Centru Social Sestaferia - Payares 2017

Payares vien cargáu d'actividaes. Entamamoscon un Samain pa neñes y neños nel que tendremos un taller de calabaces, sidre del duernu y castañes. El domingu 5 visítanos dende Valladolid el músicu Guille Jové pa mostranos n'acústicu les sos composiciones. El 9 ye'l día de la tertulia d'El Garrapiellu, que esti mes profundiza nos trataos de llibre comerciu CETA y TTIP. El 18 averamonos a l'actualidá de Colombia nuna charra qu'entama el collectivu de refuxiaes Luciano Romero Medina, siguía d'un pinchéu solidariu con que sofitalos. Y el 25 xuntámonos cola xente de Picu Rabicu pa festexar que los dos proyeutos ya llevamos unos añinos per equí. Tai sollertes pa más información. Además, tolos miércoles podéis deprender a cacharrear un migayín na música lletrónica nel Taller de creación sonora Hierbabuena. Y los xueves también abrimos.

18.4.17

Actividaes del Centru Social Sestaferia en abril y mayu de 2017

Entamamos les actividaes de abril y mayu con dos proyeiciones. El sábadu 22 (19.00 hores) parasemos el documental animalista de Xabier Ortíz de Urbina '¿Cómo que cómo como?', ganador en 2013 del premiu na primera edición del festival Ecozine de Zaragoza. Un día depués, el domingu 23, pasaremos elñ documental 'Nola?', que Fermín Muguruza grabara en Nueva Orleans con músicos d'esta ciudad, 10 años depués de que fuera arrasada pol Katrina. Muguruza fae el viaxe pa grabar un discu reinterpretando los clásicos de la ciudá y tres de la proyeición, pondremos el discu pa sintir el resultáu.
Demientres tola selmana y hasta el mesmu domingu día 23, con motivu del día del llibru ufiertaremos además un 10% de descuentu en llibros a tola xente. Si sois socies/os de Sestaferia, recordai que ya tenéis esi 10%, colo que esta selmana podéis descontar un 20% nos llibros que merquéis.
Na última selmana d'abril visitaremos el CSA La Xusticia pa participar nel alderique ente centros sociales d'Asturies, dientru la programación d'aniversariu d'esti centru social de La Felguera. Na tarde del xueves27 tendremos nel llocal a Xurde Margaride Fotografo. pa deprender dalgunos conceptos básicos y prácticos alrodiu de la fotografía col móvil (el taller ye de baldre) y aplicarlos darréu nes semeyes que tomemos col teléfonu. El sábadu 29, FUSOA entama una xinta solidaria a la que siguirá'´alderique 'Represión, conflictos sociales y autodefensa' y la rifa d'un cuadru, nomáu 'Autodefensa'. 

Y pa mayu ya tenemos programaos dos conciertos: La gorruca de Maxi y PROYECTO SOL. Esperamos que vos presten.


23.2.17

Tres un tiempu ensín carteles xenéricos de la nuesa programación, vos dexamos el cartel cola programación pa lo que queda de febreru y pa marzu. Entamamos col conciertu de César Maltrago y los atractores extraños. Tendremos tamién dos talleres. El primeru, de baldre ya organizáu pol colectivu Reciella ye pa que ñeños y neñes deprendan a facer frixuelos y otres llambiotaes d'Antroxu. El otru ye el ya tradicional taller de güertos urbanos con Aida Fernandez Aured. El taller tratará esta vegada de les plantes de usu culinariu y les sos propiedaes. Farase en cuatro xueves consecutivos y el preciu ye de 20€ pa socies/os y 30€ pa non socies/os (podéis apuntavos hasta el 7 de marzu por mensaxe de facebook y contactando con Aida nel email elhuertodeaida@gmail.com; embaxu tenéis el cartelu específicu del taller con más información). Tamién tendremos un Antroxu pa neños y neñes en sesión vermú dedicáu a la maxa y la bruxería, y dos presentaciones: la del númberu 7 de la Publicación Periódica Feminista: La Madeja, dedicáu a los miedos, y la del llibru asoleyáu por Víctor José Cuetos González. Pa completar el programa, daqué de música tradicional pa festexar al mou paganu el S.Patrick's Day, col dúo Harpe DIem, formáu por Dani García de la Cuesta y Pedro P. Sanjurjo. Amás de too esto, caltenemos los nuesos horarios habituales y añadimos ún más: la tarde de los miércoles tará la xente de Sestatrónica faciendo jam session. Nun paran de llegar novedaes editoriales a la distri y tamos a puntu de reinaugurar la nuesa biblioteca. ¡Vémonos en Sestaferia!


8.9.16

Actividaes del Centru Social Sestaferia - Setiembre 2016


El cartelu llega esti mes unos díes tarde y nun tuvo a tiempu pa meter la marcha de collectivos al pozu Funeres nin la presentación del llibru 'Entreteniendo a los pobres. Una crítica político ideológica de las medidas de lucha contra la exclusión social'. Sicasí, avanzamos la fecha de dos actividaes d'Ochobre.
Como les escolines y escolinos, la vuelta al cole de Sestaferia vien con llibros a esgaya. Entamamos del Xueves 8 al sábadu 10 cola amuesa del material de la distri nel puestín que atoparéis nel Alcuentru'l Llibru Anarquista d'Asturies (recordai que les socies y socios tienen un 10% de descuentu). El miércoles 14, Xosé Ramón Fernandez Garcia presentaranos el so diccionariu castellán-asturianu, un trabayu de más de dos décades. El xueves 22 tendremos un alderique-presentación del llibru '15M #acampada_xixon', del fotógrafu Xurde Margaride Cuntaremos cola presencia del autor y d'un miembru de la PAH Asturias, collectivu al que se sofita cola venta del llibru. El domingu 25 participamos nos actos de sofitu a la campaña #BDS y a los 9 del Jovellanos con un vermú solidariu nel que cuntaremos cola presencia del activista palestín Jamal Juma, del comité del BDS n'Israel y coordinador de la campaña Stop the Wall.
N'Ochobre, allugaremos la presentación de la reedición del llibru de Fer 'Amarraza' (el sábadu 1) y la actuación de Antón Menchaca (el vienres 7).
#FaeSestaferia

El día pa aconceyase camuda del último martes al últimu llunes de cada mes a les 19.00

15.7.16

El domingu 17 de Xunetu'l barriu El Carmen ta en Fiestes. Lleguen les Fiestes Populares del Carmen, esti añu en un nueu emplazamientu, más afazaízu y reivindicativu: El Solarón (pal pueblu de Xixón). Como tolos años dende que recuperamos les fiestes populares del barriu en 2006, nun faltará la xinta popular, la musiquina nin la folixa. Como ya ye vezu, les fiestes del barriu tan entamaes por Picu Rabicu y Sestaferia.

Aprovechando'l cambiu d'escenariu esti añu nes Fiestes del Carmen facemos una xira, polo que convidámosvos a toes y a toos a llevar manteles, sombrillas, tortielles,... Esti añu habrá menú veraniegu (con opción vegana) porque les previsiones falen d'un sol de restallu y camentamos que la fabadona d'otros años nun ye pa tar na soleyera d'un prau. Na barra habrá tamién empenaes varies, bollos preñaos, sidre, cerveza y béboras ensín alcohol

El programa ye'l siguiente:

FIESTES POPULARES DEL CARMEN 2016

EL SOLARÓN, XIXÓN, DOMINGU 27-7
DENDE LES 13.00 A LES 22.30

-SESIÓN VERMÚ
-XUEGOS TRADICIONALES CON EL GARRAPIELLU
-XINTA POPULAR
-CONCIERTU: 
LES BARBARES BARBÚS 
NACHO ÁLVAREZ
DJ's: JAHZZAR y DR. KABUKIMAN





La participación na folixa del barriu ye sicasí más importante esti añu por facese nel solarón. como actu de reivindicación pa usu del pueblu d'un espacio que nel so orixen nun xurdiera con otru enfotu qu'el de la especulación urbanística.¡¡¡Puxa les Fiestes Populars del Barriu El Carmen!!! ¡¡¡El Solarón, pa pueblu de Xixón!!!

7.6.16

Equí ta'l programa d'actividaes pa los meses de Xunu y Xunetu. Entamamos con Paco Álvarez y 'Lluvia d'agostu', el trabayu espublizáu pola editorial Hoja de Lata col que ganó'l premiu Xosefa Xovellanos. El periodista afincáu en Venezuela Alejandro Fierro traeranos otra visión del país sudamericano distinta enforma de la que ufiertan los medios de comunicación. Nestas selmanes tendremos dos conciertos: John Paperback n'acústicu y l'arpista Josep María Ribelles, con Dr. Smith, Dani García de la Cuesta y dellos músicos más. El dibuxante Ruma Barbero presentará nel llocal 'El viaxe a la lluz', el so últimu trabayu, espublizáu pola editorial Suburbia y col que llevose el premiu Alfonso Iglesias de cómic. Tamién tendremos un taller, n'esta vegada de cocina brasileña (pondrase un bote pa sufragar los gastos y ye necesario apuntase pa calcular cantidaes, hai que facelu por mensaxe en facebook o dexándonos un e-mail en sestaferiaxixon@gmail.com). Y por si too esto ye pocu, a mediaos de Xunetu entamámosla bien gorda coles Fiestes del Barriu'l Carmen que recuperáramos acuantayá. Como ya ye vezu, l'actividá farase man a man coles/os collacies/os de Picu Rabicu.
Y siguimos cola campaña ‪#‎FaeSestaferia‬
Ente toes y toos facemos Sestaferia dende la Seronda de 2003. Si tienes actividaes que proponer, sabes facer daqué y prestaríate compartilo con otra xente nun taller pásate poles asamblees del último martes de cada mes o ponte en contautu con nós. Y si quies echar un gabitu sofitándonos, nel menú de la versión web d'esti blog atoparás comu facelu. Y tamién en los flyers que pues atopar en dellos llocales de Xixón. Tenemos dellos proyeutos de meyora del llocal pa algamar un espaciu afayaízu. #FaeSestaferia!
Pa les/os emigraes/os o xente de fuera d'Asturies que nun pue tar nes actividaes, vos recordamos que nel nuesu podcast n'Ivoox colgamos dalgunos de los audios pa que puedan siguir sintiéndose. ¡Esparde la idea!

 

1.6.16

#FaeSestaferia


#FaeSestaferia

Sestaferia ye un Centru Social cuya actividá tien como epicentru el barriu del Carme y el muelle de Xixón, una faza de la ciudá sometía a una gran presión comercial y especulación urbanística, amás de convertise n’espaciu d’espardimientu y alcuentru nel centru históricu de Xixón. Desque se constituyó en conceyu Sestaferia convirtióse nun espaciu abiertu cuyo denominador ye remanar l’aición organizada de cualesquier persona y grupu que tenga como oxetivu una tresformación en favor d’una sociedá más xusta y llibre.




Sestaferia desendolca’l so llabor de manera asamblearia tratando tamién de averase a les necesidaes del entornu y les persones coles que convivimos nel barriu o les que pasen davezu por él. Camentamos que la meyor manera de cumplir esos oxetivos ye facelo ensin dependencies y de manera autoxestionada. 

Nos sos años d’esistencia Sestaferia agospió y dió abellugu a numberosos coleutivos pa que tuvieren un llugar onde poder aconceyase, magar que na ciudá esisten otros centros, públicos o non, y realizar les sos actividaes. La intención yera y sigue siendo ufrir la posibilidá de cuntar con un espaciu independiente y acoyedor. 

Durante toos estos años organizáronse en Sestaferia milenta conferencies, presentaciones de llibros, cursos y seminarios, conceyos, proyeiciones y audiciones, conciertos o folixes, siempre cola solidaridá en mente. Prestóse sofitu a coleutivos de trabayadores en llucha, a diferentes grupos del movimiento ecoloxista y feminista. Foi focu de difusión de idees antimilitaristes, coles o en defensa de los derechos llingüísticos. Recuperemos les celebraciones del barriu que nun se facíen dende cuantayá, cola comida popular entainando la participación del vecindariu, o comides pa recaudación de dineru destináu a facer frente a los costes de la represión contra toos y toes aquelles persones que lluchen poles llibertaes y causes sociales. 

Pa quienes nos identificamos col anticapitalismu, qu’entendemos como una aspiración emancipadora y plural, ser conscientes del refugu que causa a los privilexaos que dominen el poder económicu y políticu la esistencia de sociedaes onde circulen llibremente les idees antagóniques del orde social ye suficiente satisfaición. Pero tener motivos frente al “sistema” nun garantiza, por sí solo la sobrevivencia de dichos espacios. Ye necesario organizase pa tener capacidá de resistencia. Y eso significa pagalos y contribuyir a la so autosuficiencia material. 

La económía de Sestaferia siempre reposó nun garapiellu de socios y socies venceyaos/es colos sos fines que-y aportaren les perres suficientes pa caltener un llocal y unos medios mínimos pa furrular. Ensin embargu, nesti tiempu de crisis fondera caracterizada pola desigualdá y la concentración de riqueza en perxuiciu de les clases trabayadores Sestaferia tiénlo difícil pa sobrevivir y facelo cola brenga y l’arremangu necesarios. Los nuesos medios vienen principalmente del esfuerzu de los socios y les socies, de l’actividá de la distribuidora de llibros y música y del chigre del llocal. Munches de les persones que podíen apurrir una cuota mensual tuvo que dexar de facelo porque nun tienen ingresos suficientes. Sestaferia tien un pilancu como tantes y tantos de nós. Sestaferia tampoco nun acude a nenguna convocatoria de subvenciones. Por eso entamamos una campaña d’apoyu económicu, Camentamos qu’ente problemes coleutivos tenemos que dar rempuestes coleutives, socializando les dificultaes y torgues pero tamién les soluciones. Por eso pidimos el to sofitu, que mos ayudes pa poder ayudamos. Ente toes y toos faemos Sestaferia dende Ochobre de 2003.

 

Vídeu Campaña #FaeSestaferia

(Gracies a Arma X y Estela pol trabayu de grabación ya edición)

¿CÓMO FACER SESTAFERIA?


FÁITE SOCIA/U
1) Modalidá Sofitu: 10 €/mes
2) Modalidá Sofitu Precaries/os: 15 € cada tres meses

Toles/os socies/os tan invitaes/os a los conceyos y tienen un 10% de descuentu en tolos llibros y música que se puen mercar en Sestaferia, amás de descuentos nos cursos y talleres de pago.

Pues domiciliar la to cuota y avisanos por e-mail (asina nun pagamos comisiones al bancu)
Cuenta (Liberbank):  ES12 2048 0003 6234 0010 8708

O apúrrenos los tos datos y nosotros pasámoste el recibu.
Nome:
Apellíos:
Señes:
e-mail:
Teléfonu:
DNI:
Númberu de cuenta (20 díxitos):
Firma:

SOFÍTANOS CON UNA APORTACIÓN PUNTUAL
A la cuenta bancaria o de Paypal que vien nel apartáu anterior.

PARTICIPA EN LES ACTIVIDAES, MERCA EN LA DISTRI Y TOMA ALGO NEL CHIGRE
Ye daqué abiertu a socies/os y non socies/os

ECHA UN GABITU O TRAE PROPUESTES
Pa facer Sestaferia también fae falta xente, Pásate polos conceyos l'últimu martes de cada mes a les 19.00.

30.4.16

El pasáu martes 26 tuvo llugar el conceyu mensual de Sestaferia nel que se zarraron les actividaes de Mayu que vos ponemos de siguíu.
ACTIVIDAES
DOMINGU 1. DENDE LES 14.30. Puestín de la Distri de Sestaferia nel Pueblu d'Asturies, con delles de les últimes novedaes que llegaren.
MARTES 3. 19.30. Esther Priero, responsable de la Editorial Trabe, visítanos comu actu central de la Selmana Les Lletres pa presentar les novedaes d'esta editorial qu'apuesta por asoleyat llibros n'asturianu.

MIÉRCOLES 4. 19.30. Proyectamos 'Bernabé', el primer llargometraxe n'asturianu de la hestoria.
XUEVES 12. 19.30. Noel Pruneda, expertu en xeopolítica nos países árabes y miembru del Comité de Solidaridad con la Causa Árabe, analiza lo que pasó neste área dende la primavera árabe hasta la guerra en Siria y presentaranos un llibrín que ta acabantes d'asoleyar.
SÁBADU 14. 13.00. Picnic ellectrónicu, con musiquina de DJs, visuales y daqué pa xintar. En sesión vermú.

MARTES 17. 19.30. Visitaranos Manolo, superviviente de la Coordinadora de Presos en Lucha (COPEL) pa cuntanos la hestoria d'esti hestóricu collectivu.
MIÉRCOLES 18. 19.30. Aby, voceru estatal de la mocedá saharaui cuntaranos de primera mán lo que ta pasando nel Sáhara.
SÁBADU 21. 18.00. Folixa Tinéu Rules (nun ta nel cartelu). Con musiquina, sidra y chosco.
MIÉRCOLES 25. 19.30. Presentaremos el llibru 'I'm Alone Like You & Morirse de tanta vida', de Malena Guzmán y David Aguilar y asoleyáu por Suburbia Ediciones.
XUEVES 26. 19.30. Esti día presentamos la nueva campaña de socios #FaeSestaferia, coles nueves cuotes. Ye perimportante tar arropaos na presentación, asina que vos agradeceríamos si pudiérais tar ellí.

VIENRES 27/SÁBADU 28/DOMINGU 29. Entamamos les primeres xornaes de la cerveza artesano. Pincharemos un barril de Caleya y presentaremos dellos proyectos paecíos a esti que surdieron en otros llaos. Tendremos una cata de cerveza y quesu y, probablemente, tamién un taller pa facela. Tai sollertes pa conocer el programa completu.

MARTES 31. 19.00. Conceyu Sestaferia Mayu

Por otru llau, demientres la Selmana les Lletres tolos llibros y discos n'asturianu tan col 10% de descuentu.

8.4.16

Retomamos l'actividá del blog col Calendariu d'actividaes de Sestaferia p'Abril de 2016. Tamién actualizamos el llistáu con too'l material que güei podéis atopar na distri de Sestaferia


23.1.13

Pa una información más actualizao podéis siguinos en Facebook (Sestaferia Centru Social) y Twitter (@SestaferiaCS) pa tar al tantu d'actividaes y novedaes. Tamién tenemos cuentes de Youtube ya Ivoox

22.1.09

PRESENTACIÓN DEL DVD-CD "25 AÑOS A LA GUETA LA TRADICIÓN"




Esti prósimu miércoles, 28 de Xineru, va tener llugar nel llocal de Sestaferia la presentación del trabayu documental en CD+DVD "25 años a la gueta la tradición".

La presentación entamará a les 20:30 hores y cuntará cola participación del su realizador, Pablo A. Quiroga Prendes.

Ponémosvos un pequeñu comentariu sobre esta obra.


“25 años a la gueta la tradición”

25 años pasaron yá dende que se fundara’l Grupu de Baille Tradicional San Félix de Candás, 25 años que se recueyen agora nun documental realizáu por Pablo A. Quiroga Prendes, y que lleva por títulu “25 años a la gueta la tradición”.

Nel documental, d’una hora de duración fáese un percorríu dende l’entamu del Grupu hasta los nuesos díes, de la mán de los personaxes que fueron dándo-y forma al qu’anguañu ye referente nel trabayu de recuperación de la cultura tradicional asturiana na fastera d’El Cabu Peñes.
Un camín qu’entama en 1983, de la mán de Juan Casas (actual director del Feltival Intercélticu d’Avilés), nel llocal del Club Náuticu de Carreño, y que pasa pela evolución nel estilu, de la “Sección Femenina” qu’había d’aquella al folklore tradicional más verídicu. Fae hincapié’l documental na importancia que tuvo la influencia de la inrepetible Fini Suárez, nun sólo nel Grupu de Baille Tradicional San Félix, sinon no que ye l’estudiu del folklore n’Asturies.
Además fízose una edición llimitada de copies, col finxu de qu’aquelles persones interesaes puedan teneles en casa.
Nesta edición, amás del DVD col documental “25 años a la gueta la tradición”, va incluyíu un CD con 7 temes, de los que 5 son canciones tradicionales recoyíes pol Grupu de Baille Tradicional San Félix na zona’l Cabu Peñes, 1 tema propiu del conceyu d’Ayer y finalmente una reellaboración de la Danza de Gozón a cargu de Marco Castañón (Skanda), Laura Fernández (Nerbia) y Ana de la Fuente (Skanda).

16.12.08

Proyeición "Three Rooms of Melancholia"

Esti prósimu miércoles, 17 d’avientu, última proyeición del añu nel CS Sestaferia. Pa cerrar la temporada, vamos proyectar, a partir de les 7 la tarde y con entrada llibre y de baldre, “Three Rooms of Melancholia”, del que vos axuntamos un pequeñu comentariu.

Three Rooms of Melancholia
Esti documental de la filandesa Pirjo Honsakalo muestra tola devastación que se desencadena en tornu al conflictu de Chechenia. El documental divídese en tres “estancies” y toes elles tienen como protagonistes a neños.
El primer episodiu –“añorar”- ye la crónica de la vida diaria na academia militar de Kronstadt, cerca de San Petesburgu. Anque a dicir verdá, paez un orfanatu más qu’otra cosa. Les breves intervenciones de la voz n’off mencionen los nomes, edá y antecedentes de familiares los pequeños soldaos. La mayoría proceden de families desestructuraes: padres alcohólicos, maltratadores, indixentes… o cenciellamente ensin tiempu pa cuidar de los sus fíos. Na rutina de l’academia los neños algamaron cierta estabilidá, pero nun hai qu’escaecer que tán siendo entrenaos pa combatir nuna guerra interminable.
Lo cual nos lleva a Grozni, capital de la república de Chechenia. Na segunda estancia –“alendar”-, rodada en blancu y negru pero menos conmovedora que la primera, una muyer dedícase a recoyer a neños de los edificios en ruines. Nesta ocasión trátase de tres pequeños que nun pueden ser atendíos pola su má, gravemente enferma.
L’últimu episodiu títulase “recordar”. El campu de refuxaos d’Ingushetia nos deja ver cómo se vive el conflictu al otru lláu de la frontera. De nuevu, como na primer parte, los güérfanos son los protagonistes d’esta hestoria.

9.12.08

Proyeición "Buenas noches, Ouma"


Esti miércoles, 10 d’avientu, nuea proyeición nel CS Sestaferia. A partir de les 19:30 podremos ver “Buenas noches, Ouma”, un documental ellaboráu por Fernando León de Aranoa y que trata sobre los neños soldáu d’Uganda.

La entrada ye llibre y de baldre.

BUENAS NOCHES OUMA

Cuando cae la nuechi, munchos neños caminen dellos kilómetros hacia los refuxos de les ciudaes pa evitar ser secuestraos pola guerrilla del Exércitu de Resistencia del Señor (LRA). Llámenlos los “caminantes nocturnos” (night commuters). Los mozos pasen la nuechi nos refuxos y al alborecer regresen a les sus cases. Asina eviten ser capturaos pol LRA. Cálculase que nos últimos 20 años más de 20.000 neños fueron secuestraos pola guerrilla pa convertilos en neños soldáu o, nel casu de les neñes, n’esclaves sexuales. Los guerrilleros prefieren a los neños porque son obedientes, nun protesten y pue facese con ellos lo que se quiera. Perpocos neños consiguieron escapar y los que lo ficieron rellaten hestories d’horror. Como se diz nel documental, tán sicolóxicamente destruyíos. Tienen mieu a la nuechi, porque col sueñu lleguen les pesadilles, nes que reaparecen imáxenes de los combates y los abusos a los que fueron sometíos polos sus captores. Fernando León recueye los testimonios de los mozos que van a los refuxos pa poder dormir tranquilos y tamién de los que fueron neños soldáu y tovía nun consiguieron conciliar el sueñu. Toos asocien la nuechi col pelligru. La sensatez de munchos d’ellos ye pa plasmar. Resulta encomiable’l llabor de quienes trabayen p’ayudalos a superalo, con cariñu, comprensión y dedicación. Muncho más de lo que nunca nun recibirán del su gobiernu.

1.12.08

Proyeición "Las tortugas también vuelan"


Esti miércoles, 3 d'avientu, va tener llugar nel CS Sestaferia (C/ Numa Guilhou, 14, Xixón) la proyeición de la película "Las tortugas también vuelan", la primera d'una serie de proyeiciones sobre infancia y conflictos bélicos que van tener llugar esi mes d'avientu.

El pase entamará a les 7 la tarde, y la entrada ye llibre y de baldre.

LAS TORTUGAS TAMBIÉN VUELAN

Los habitantes d’un pueblín del Kurdistán iraquí, na frontera ente Irán y Turquía, busquen desesperadamente una antena parabólica pa consiguir noticies sobre l’inminente ataque de los Estaos Xuníos contra Irak. Un mozu mutiláu, que vién d’otru pueblu cola su hermana y un nenu pequeñu, tién una premonición: la guerra tá cada vez más cerca...

25.11.08

Proyeición "Loose Change: Final cut"


Esti miércoles, 26 de payares, ultimu pase del ciclu sobre la democracia yanki en Sestaferia (C/ Numa Guilhou, 14, Xixón), a partir de les 8:30 la tarde, con entrada llibre y de baldre. El documental elexíu nesta ocasión ye "Loose change, final cut", del que vos apurrimos un comentariu.

LOOSE CHANGE

Esti ye quiciavis el documental más conocíu en cuanto a les teoríes conspiratives sobre’l tráxicu atentáu de les Torres Ximielgues nel World Trade Center el 11 de setiembre del 2001, nos Estaos Xuníos.

Nesti trabayu, el realizador Dylan Avery plantega (basao en documentos, declaraciones ya imáxenes) primero, que’l derrumbe de les torres xeneral del WTC fueron españíos controlaos, talu y como suelen derrumbase edificios nel sector de la construcción.

Segundo, que si bien ye cierto, estrelláronse aviones nes Torres Ximielgues, estos nun yéren aviones comerciales sinon aparentemente aviones equipaos con armes militares.

Y por último, que’el vídeu sobre Bin Laden, nel que se declaraba culpable de los atentaos ye falsu.

18.11.08

Proyeición "America freedom to fascism"


Esti miércoles 19 de payares, tercer entrega del ciclu de documentales sobre la democracia yanki qu'entama el CS Sestaferia, a partir de les 19 hores, con entrada llibre y de baldre. Nesta ocasión ye "America freedom to fascism", de la que vos axuntamos una pequeña sinopsis:

El productor Aaron Russo embarca nun viaxe al traviés del su país en busca de la llexislación específica qu’obliga a los ciudadanos de los EEUU a pagar l’impuestu sobre la renta. Esta película que nun ye nin d’izquierdes nin de dereches ye en realidá un examen exahustivu al gobiernu. Espón la erosión de les llibertaes civiles nos EEUU qu’entamó en 1913 cola creacion del fraudulentu sistema de la Reserva Federal, y lo fae mediante entrevistes a Congresistes, antiguos comisionaos del IRS (fiscu), ex-axentes del IRS y FBI, asesores d’impuestos y escritores. Russo ata los cabos esistentes ente la creacion del dineru, l’impuestu sobre la renta federal, y la tarxeta nacional d’identidá, que se convierte en llei en mayu’l 2008 (DNI dixital). Esti DNI va usar la tecnoloxía d’Identificacion por Radiofrecuencies (RFID) mediante microchips implantaos nes tarxetes, qu’esencialmente son aparatos usaos pa monitorizar a la xente. Esti documental demuestra con gran detalle l’innegable fechu de que los EEUU tán convirtiéndose nun estáu policial.

11.11.08

Proyeición documental Zeitgeist

El prósimu miércoles, 12 de Payares, proyeición del segundu documental del ciclu sobre la "democracia" yanki nel CS Sestaferia (C/ Numa Guilhou, 14, Xixón).

Será a partir de les 7 la tarde, y nesta ocasión el documental proyectáu será Zeitgeist. La entrada ye llibre y de baldre.

Zeigeist

El documental tá estructuráu en tres partes. La primera ye una esposición del cristianismu como un miyu, un híbridu astrolóxico-lliterario. Esti mitu constiúi’l terrén abonáu sobre’l que pueden funcionar nuevos mitos nos que les mases crean ciegamente y asina ser manexaos con mayor facilidá. La segunda parte espón el funcionamientu de la propaganda y adoctrinación mediática, llogrando que los propios ciudadanos acepten ser más controlaos polos sus gobiernos.

La tercer seición fala sobre la xeopolítica y economía global enfocándose nel monopoliu del dineru (xunto a la especulación financiera) y el gastu militar.

Primer parte: La hestoria más grande contada enxamás

Na primer parte del documental descríbense les semeyances qu’esisten ente relixones antigues y el cristianismu.

Por medio d’una serie d’acontecimientos y feches rellacionénse les narraciones relixoses más conocíes cola descripción astrolóxica que los exipcios relaten sobre’l dios Horus en forma d’hestoria mitolóxica.

Fáese hincapié en que ciertos atributos de mitos anteriores fueron copiaos y atribuyíos polos primeros cristianos al Jesús hestóricu.

Como conclusión de la primer parte, el documental suxer que Jesús de Nazareth enxamás nun esistió.

Segunda parte: Tol mundiu ye un escenariu

Nesti capítulu intenta demostrar que los ataques del 11S en Nueva York y los atentaos del 7 de xunetu de 2005 en Londres fueron en realidá perpetraos por dalgún grupu de poder d’EE. UU.

Esta operación de bandera falsa taría encaminada a consiguir el beneplácitu de la sociedá estaoxunidense pa entamar les reformes necesaries que permitiríen l’entamu de una serie d’invasiones de puntos estratéxicos como son Afganistán, Iraq e Irán.

Tercer parte: Nun prestes atención a los homes detrás de la cortina

Nel últimu capítulu detállase’l nacimientu del Bancu Central d’E.E.U.U., la evolución del sistema monetariu y por último los supuestos fines de los homes detrás de la cortina, que diríen dende la creación de la Xunión Norteamericana ya implantación de chips RFID en toles persones del planeta, hasta la declaración d’un gobiernu global.

Ye’l capítulu onde a partir de la segunda mitá, específicamente nel tema sobre’l futuru de la xeopolítica, más se mecen proyeiciones sobre sucesos futuros ensin l’análisis hestóricu.

3.11.08

Proyeición documental "Hacking democracy"

Ésti mes de Payares el Centru Social Sestaferia (C/Numa Guilhou, 14, Xixón) entama un ciclu de documentales sobre la "democracia" yanki, tan de portada estos díes pola cellebración de presidenciales nesi territoriu. Les proyeiciones van ser tolos miércoles, a eso de les 7, y con entrada llibre y de baldre.

La primer proyeición será la de Hacking democracy, nel que s'espeyen los intringulis del curiosu sistema de recuentu de les elleiciones estauxunidenses. Equí va un pequeñu resume d'esti documental de 80 minutos de duración:


Argumentu:

Un documental que cuestiona la seguridá del votu lletrónicu nos EEUU. Allí fae años yá que nun tol mundiu vota con papeletes sinon que cada vez usénse más les maquinoles de votu lletrónicu.

Dellos ciudadanos y espertos n’informática quéxense reiteradamente de la poca seguridá d’esti métodu, pero con motivu de les elleiciones llexislatives d’ayeri fízose públicu un documental qu’argumentaba estes duldes.

El documental preséntase asina:

“Esta ye la hestoria d’un pequeñu grupu de ciudadanos dirixíos por una güela de Seattle. Entamen esti viaxe pa responder a una sola entruga: ¿cómo fae américa pa cuntar los sus votos?. Lo qu’alcuentren ye secretismu, votos na basoria y maneres de cómo cambiar el cursu de la hestoria” .......

7.10.08

Charra: "La mocedá palestina baxo la ocupación sionista"

Esti prósimu vienres, 10 d'Ochobre, va tener llugar nel local de Sestaferia una charra-debate sobre la situación de la mocedá palestina.

Entamará a les 6 de la tarde, y cuntaremos cola participación de:Juani Ruíz Sánchez, miembro de los Comités de Salú, y el su fíu, George Rismahwi, mozu palestinu que vivió hasta los 18 años nel guetu formáu pol muru sionista.


La entrada ye llibre.

24.9.08

GRAN FOLIXA HEREXE


Esti sábadu, 27 setiembre, vamos cellebrar en Sestaferia l'éxitu de la primer campaña d'apostasíes colectives cellebrada n'Asturies.

Les solicitúes presentaes tán recibiendo contestación afirmativa, polo qu'unes 75 asturianes y asturianos dexaron nes últimes selmanes de "pertenecer" a la Ilesia Católica.

Y ye'l momentu de cellebralo, col siguiente programa d'actividaes previstes pal sábadu:

18 hores: Proyeición de la película "Así en el cielo como en la tierra"

20 hores: Llectura d'un manifiestu atéu.

20:15 hores: Folixa amenizada con rabelaes populares en vivo.

Táis convidaes toes y toos a cellebrar ésti éxitu con nós.

16.7.08

Sestaferia na Semana Negra

Como los dos años anteriores, Sestaferia tien un puestíon na Semana Negra onde pues alcontrar les últimes novedaes de la nuesa distribuidora, garrar solicitudes para facer la apostasía o ponete en contactu con nos pa lo que seya.

Atopar el puestín de Sestaferia ye percenciellu. Tamos a la altura de la chimeneona de Poniente (que acuantayá perteneció a la Compañía de Maderas de Demetrio Fernández Castrillón), al llao de los bomberos y nuna carpa que compartimos col escritor mexicanu Fritz Glockner y la Fundación Federico Engles.

3.7.08

Campaña d´Apostasía Colectiva del Centru Social Sestaferia de Xixón (2º asaltu)

Dempués de los impedimentos y trabes varies pa nun garrar les peticiones d´Apostasía que-y apurrimos al arzobispáu, tornamos a intentálo, esta vegada en grupu, y acompañaes por toes les que queráis apostatar y/o sofitar esta campaña.

El prósimu xueves 10 de xunetu, taremos na plaza la Corrada l´Obispu d´Uviéu, frente´l arzobispáu, dende les 11:00 la mañana, p’axuntar el mayor númberu posible d´apóstates y dir toes xuntes a presentar la nuesa baxa irrevocable na ilesia católica. A eso de les doce la mañana fadremos l´actu, pal que trataremos de cuntar cola presencia de medios de comunicación como la primer vegada. D´esta mena, llograremos el doble oxetivu d´esta campaña, borranos de la secta y criticar públicamente que nun estáu laicu como se supón que ye ésti, esista una relixón sofitada con perres públiques que tá permanentemente desbabayando. Tamos fartes de conferencia episcopal, cope, papas, cardenales y obispos....

Si yá nos enviaste la to petición d´apostasía, pónte en contautu con nos, nel Centru Social Sestaferia, pa venir el prósimu xueves 10 al arzobispáu y, si nun puedes, pa enviala por correu certificáu.

Si tás pensándolo o simplemente quiés saber cómo furrula esto, taremos frente´l arzobispáu con tó lo necesario p´apostatar, namás fai falta´l DNI y la voluntá firme d´abandonar el catolicismu y tolo que representa.

17.6.08

Comedor veganu


Tres dellos díes de parón na actividá, vuelve'l movimientu a Sestaferia. Esti sábadu, 21 de Xunu, nueu comedor veganu.


A partir de les 2 y, como siempre, a preciu voluntariu.Dempués del comedor, a les 5, proyección del documental Earthlings, del que vos axuntamos un breve comentariu.


EARTHLINGS ye una película documental sobre la dependencia absoluta de la humanidá hacia los animales (como mascotes, alimentu, ropa, entretenimientu y análisis científicu) pero espeya tamién la nuestra total falta de respetu hacia ellos. La película tá narrada pol nomináu a un premiu de l’Academia Joaquin Phoenix (GLADIATOR) y lleva la música del aclamáu artista Moby.


Con un estudiu en profundidá sobre tiendes d’animales, criaderos y refuxos de animales, asina como les granxes factries, el mercáu del cueru y les pieles, les industries del entretenimientu y los deportes y finalmente la profesión científica y mélica. EARTHLINGS utiliza cámares escondíes y metraxe nunca vistu antes pa facer una crónica de les práctiques que día énte día empleguen dalgunes de les industries más grandes del mundiu, toes elles basades dafechu nel beneficiu que saquen de los animales.Poderosa, informativa y reflexiva, EARTHLINGS ye con muncho’l documental más comprensible nunca producíu sobre la rellación ente Ñatura, animales ya intereses económicos humanos.

27.5.08

Apostatamos.


El prósimu llunes, 2 de Xunu, el Centru Social Sestaferia dará acabu a esta primer campaña d'apostasíes cola entrega na sede del Arzobispáu d'Uviéu de los formularios recoyíos hasta'l momentu. Sestaferia seguirá recoyendo estos formularios hasta'l vienres día 30.


Pa finalizar esta primer campaña, Sestaferia organiza dos actividaes lúdico-reivindicatives nos prósimos díes.


Esti xueves, día 29, vamos tener nel local del Centru (C/Numa Guilhou, 14, Xixón) a Carlos Alba "Cellero", que faerá un monólogu referente al tema, a partir de les 19:30 hores y con entrada llibre.


El vienres 30, y tamién de baldre, tendrá llugar nel Savoy Club (C/Pelayo, 2, Xixón) un conciertu del grupu xixonés de fusión-rock "Apostasía". El conciertu entamará a les 22 hores.