Sestaferia Centru Social

PRESENTACIÓN DEL DVD-CD "25 AÑOS A LA GUETA LA TRADICIÓN"

2009-01-22T12:00:00.005+01:00

Esti prósimu miércoles, 28 de Xineru, va tener llugar nel llocal de Sestaferia la presentación del trabayu documental en CD+DVD "25 años a la gueta la tradición".

La presentación entamará a les 20:30 hores y cuntará cola participación del su realizador, Pablo A. Quiroga Prendes.

Ponémosvos un pequeñu comentariu sobre esta obra.

“25 años a la gueta la tradición”

25 años pasaron yá dende que se fundara’l Grupu de Baille Tradicional San Félix de Candás, 25 años que se recueyen agora nun documental realizáu por Pablo A. Quiroga Prendes, y que lleva por títulu “25 años a la gueta la tradición”.

Nel documental, d’una hora de duración fáese un percorríu dende l’entamu del Grupu hasta los nuesos díes, de la mán de los personaxes que fueron dándo-y forma al qu’anguañu ye referente nel trabayu de recuperación de la cultura tradicional asturiana na fastera d’El Cabu Peñes.
Un camín qu’entama en 1983, de la mán de Juan Casas (actual director del Feltival Intercélticu d’Avilés), nel llocal del Club Náuticu de Carreño, y que pasa pela evolución nel estilu, de la “Sección Femenina” qu’había d’aquella al folklore tradicional más verídicu. Fae hincapié’l documental na importancia que tuvo la influencia de la inrepetible Fini Suárez, nun sólo nel Grupu de Baille Tradicional San Félix, sinon no que ye l’estudiu del folklore n’Asturies.
Además fízose una edición llimitada de copies, col finxu de qu’aquelles persones interesaes puedan teneles en casa.

Nesta edición, amás del DVD col documental “25 años a la gueta la tradición”, va incluyíu un CD con 7 temes, de los que 5 son canciones tradicionales recoyíes pol Grupu de Baille Tradicional San Félix na zona’l Cabu Peñes, 1 tema propiu del conceyu d’Ayer y finalmente una reellaboración de la Danza de Gozón a cargu de Marco Castañón (Skanda), Laura Fernández (Nerbia) y Ana de la Fuente (Skanda).

Proyeición "Three Rooms of Melancholia"

2008-12-16T02:21:00.002+01:00

Esti prósimu miércoles, 17 d’avientu, última proyeición del añu nel CS Sestaferia. Pa cerrar la temporada, vamos proyectar, a partir de les 7 la tarde y con entrada llibre y de baldre, “Three Rooms of Melancholia”, del que vos axuntamos un pequeñu comentariu.

Three Rooms of Melancholia
Esti documental de la filandesa Pirjo Honsakalo muestra tola devastación que se desencadena en tornu al conflictu de Chechenia. El documental divídese en tres “estancies” y toes elles tienen como protagonistes a neños.
El primer episodiu –“añorar”- ye la crónica de la vida diaria na academia militar de Kronstadt, cerca de San Petesburgu. Anque a dicir verdá, paez un orfanatu más qu’otra cosa. Les breves intervenciones de la voz n’off mencionen los nomes, edá y antecedentes de familiares los pequeños soldaos. La mayoría proceden de families desestructuraes: padres alcohólicos, maltratadores, indixentes… o cenciellamente ensin tiempu pa cuidar de los sus fíos. Na rutina de l’academia los neños algamaron cierta estabilidá, pero nun hai qu’escaecer que tán siendo entrenaos pa combatir nuna guerra interminable.
Lo cual nos lleva a Grozni, capital de la república de Chechenia. Na segunda estancia –“alendar”-, rodada en blancu y negru pero menos conmovedora que la primera, una muyer dedícase a recoyer a neños de los edificios en ruines. Nesta ocasión trátase de tres pequeños que nun pueden ser atendíos pola su má, gravemente enferma.
L’últimu episodiu títulase “recordar”. El campu de refuxaos d’Ingushetia nos deja ver cómo se vive el conflictu al otru lláu de la frontera. De nuevu, como na primer parte, los güérfanos son los protagonistes d’esta hestoria.

Proyeición "Buenas noches, Ouma"

2008-12-09T04:29:00.002+01:00

Esti miércoles, 10 d’avientu, nuea proyeición nel CS Sestaferia. A partir de les 19:30 podremos ver “Buenas noches, Ouma”, un documental ellaboráu por Fernando León de Aranoa y que trata sobre los neños soldáu d’Uganda.

La entrada ye llibre y de baldre.

BUENAS NOCHES OUMA

Cuando cae la nuechi, munchos neños caminen dellos kilómetros hacia los refuxos de les ciudaes pa evitar ser secuestraos pola guerrilla del Exércitu de Resistencia del Señor (LRA). Llámenlos los “caminantes nocturnos” (night commuters). Los mozos pasen la nuechi nos refuxos y al alborecer regresen a les sus cases. Asina eviten ser capturaos pol LRA. Cálculase que nos últimos 20 años más de 20.000 neños fueron secuestraos pola guerrilla pa convertilos en neños soldáu o, nel casu de les neñes, n’esclaves sexuales. Los guerrilleros prefieren a los neños porque son obedientes, nun protesten y pue facese con ellos lo que se quiera. Perpocos neños consiguieron escapar y los que lo ficieron rellaten hestories d’horror. Como se diz nel documental, tán sicolóxicamente destruyíos. Tienen mieu a la nuechi, porque col sueñu lleguen les pesadilles, nes que reaparecen imáxenes de los combates y los abusos a los que fueron sometíos polos sus captores. Fernando León recueye los testimonios de los mozos que van a los refuxos pa poder dormir tranquilos y tamién de los que fueron neños soldáu y tovía nun consiguieron conciliar el sueñu. Toos asocien la nuechi col pelligru. La sensatez de munchos d’ellos ye pa plasmar. Resulta encomiable’l llabor de quienes trabayen p’ayudalos a superalo, con cariñu, comprensión y dedicación. Muncho más de lo que nunca nun recibirán del su gobiernu.

Proyeición "Las tortugas también vuelan"

2008-12-01T15:50:00.002+01:00

Esti miércoles, 3 d'avientu, va tener llugar nel CS Sestaferia (C/ Numa Guilhou, 14, Xixón) la proyeición de la película "Las tortugas también vuelan", la primera d'una serie de proyeiciones sobre infancia y conflictos bélicos que van tener llugar esi mes d'avientu.

El pase entamará a les 7 la tarde, y la entrada ye llibre y de baldre.

LAS TORTUGAS TAMBIÉN VUELAN

Los habitantes d’un pueblín del Kurdistán iraquí, na frontera ente Irán y Turquía, busquen desesperadamente una antena parabólica pa consiguir noticies sobre l’inminente ataque de los Estaos Xuníos contra Irak. Un mozu mutiláu, que vién d’otru pueblu cola su hermana y un nenu pequeñu, tién una premonición: la guerra tá cada vez más cerca...

Proyeición "Loose Change: Final cut"

2008-11-25T16:58:00.001+01:00

Esti miércoles, 26 de payares, ultimu pase del ciclu sobre la democracia yanki en Sestaferia (C/ Numa Guilhou, 14, Xixón), a partir de les 8:30 la tarde, con entrada llibre y de baldre. El documental elexíu nesta ocasión ye "Loose change, final cut", del que vos apurrimos un comentariu.

LOOSE CHANGE

Esti ye quiciavis el documental más conocíu en cuanto a les teoríes conspiratives sobre’l tráxicu atentáu de les Torres Ximielgues nel World Trade Center el 11 de setiembre del 2001, nos Estaos Xuníos.

Nesti trabayu, el realizador Dylan Avery plantega (basao en documentos, declaraciones ya imáxenes) primero, que’l derrumbe de les torres xeneral del WTC fueron españíos controlaos, talu y como suelen derrumbase edificios nel sector de la construcción.

Segundo, que si bien ye cierto, estrelláronse aviones nes Torres Ximielgues, estos nun yéren aviones comerciales sinon aparentemente aviones equipaos con armes militares.

Y por último, que’el vídeu sobre Bin Laden, nel que se declaraba culpable de los atentaos ye falsu.

Proyeición "America freedom to fascism"

2008-11-18T16:41:00.002+01:00

Esti miércoles 19 de payares, tercer entrega del ciclu de documentales sobre la democracia yanki qu'entama el CS Sestaferia, a partir de les 19 hores, con entrada llibre y de baldre. Nesta ocasión ye "America freedom to fascism", de la que vos axuntamos una pequeña sinopsis:

El productor Aaron Russo embarca nun viaxe al traviés del su país en busca de la llexislación específica qu’obliga a los ciudadanos de los EEUU a pagar l’impuestu sobre la renta. Esta película que nun ye nin d’izquierdes nin de dereches ye en realidá un examen exahustivu al gobiernu. Espón la erosión de les llibertaes civiles nos EEUU qu’entamó en 1913 cola creacion del fraudulentu sistema de la Reserva Federal, y lo fae mediante entrevistes a Congresistes, antiguos comisionaos del IRS (fiscu), ex-axentes del IRS y FBI, asesores d’impuestos y escritores. Russo ata los cabos esistentes ente la creacion del dineru, l’impuestu sobre la renta federal, y la tarxeta nacional d’identidá, que se convierte en llei en mayu’l 2008 (DNI dixital). Esti DNI va usar la tecnoloxía d’Identificacion por Radiofrecuencies (RFID) mediante microchips implantaos nes tarxetes, qu’esencialmente son aparatos usaos pa monitorizar a la xente. Esti documental demuestra con gran detalle l’innegable fechu de que los EEUU tán convirtiéndose nun estáu policial.

Proyeición documental Zeitgeist

2008-11-11T03:44:00.004+01:00

El prósimu miércoles, 12 de Payares, proyeición del segundu documental del ciclu sobre la "democracia" yanki nel CS Sestaferia (C/ Numa Guilhou, 14, Xixón).

Será a partir de les 7 la tarde, y nesta ocasión el documental proyectáu será Zeitgeist. La entrada ye llibre y de baldre.

Zeigeist

El documental tá estructuráu en tres partes. La primera ye una esposición del cristianismu como un miyu, un híbridu astrolóxico-lliterario. Esti mitu constiúi’l terrén abonáu sobre’l que pueden funcionar nuevos mitos nos que les mases crean ciegamente y asina ser manexaos con mayor facilidá. La segunda parte espón el funcionamientu de la propaganda y adoctrinación mediática, llogrando que los propios ciudadanos acepten ser más controlaos polos sus gobiernos.

La tercer seición fala sobre la xeopolítica y economía global enfocándose nel monopoliu del dineru (xunto a la especulación financiera) y el gastu militar.

Primer parte: La hestoria más grande contada enxamás

Na primer parte del documental descríbense les semeyances qu’esisten ente relixones antigues y el cristianismu.

Por medio d’una serie d’acontecimientos y feches rellacionénse les narraciones relixoses más conocíes cola descripción astrolóxica que los exipcios relaten sobre’l dios Horus en forma d’hestoria mitolóxica.

Fáese hincapié en que ciertos atributos de mitos anteriores fueron copiaos y atribuyíos polos primeros cristianos al Jesús hestóricu.

Como conclusión de la primer parte, el documental suxer que Jesús de Nazareth enxamás nun esistió.

Segunda parte: Tol mundiu ye un escenariu

Nesti capítulu intenta demostrar que los ataques del 11S en Nueva York y los atentaos del 7 de xunetu de 2005 en Londres fueron en realidá perpetraos por dalgún grupu de poder d’EE. UU.

Esta operación de bandera falsa taría encaminada a consiguir el beneplácitu de la sociedá estaoxunidense pa entamar les reformes necesaries que permitiríen l’entamu de una serie d’invasiones de puntos estratéxicos como son Afganistán, Iraq e Irán.

Tercer parte: Nun prestes atención a los homes detrás de la cortina

Nel últimu capítulu detállase’l nacimientu del Bancu Central d’E.E.U.U., la evolución del sistema monetariu y por último los supuestos fines de los homes detrás de la cortina, que diríen dende la creación de la Xunión Norteamericana ya implantación de chips RFID en toles persones del planeta, hasta la declaración d’un gobiernu global.

Ye’l capítulu onde a partir de la segunda mitá, específicamente nel tema sobre’l futuru de la xeopolítica, más se mecen proyeiciones sobre sucesos futuros ensin l’análisis hestóricu.

Proyeición documental "Hacking democracy"

2008-11-03T16:33:00.003+01:00

Ésti mes de Payares el Centru Social Sestaferia (C/Numa Guilhou, 14, Xixón) entama un ciclu de documentales sobre la "democracia" yanki, tan de portada estos díes pola cellebración de presidenciales nesi territoriu. Les proyeiciones van ser tolos miércoles, a eso de les 7, y con entrada llibre y de baldre.

La primer proyeición será la de Hacking democracy, nel que s'espeyen los intringulis del curiosu sistema de recuentu de les elleiciones estauxunidenses. Equí va un pequeñu resume d'esti documental de 80 minutos de duración:

Argumentu:

Un documental que cuestiona la seguridá del votu lletrónicu nos EEUU. Allí fae años yá que nun tol mundiu vota con papeletes sinon que cada vez usénse más les maquinoles de votu lletrónicu.

Dellos ciudadanos y espertos n’informática quéxense reiteradamente de la poca seguridá d’esti métodu, pero con motivu de les elleiciones llexislatives d’ayeri fízose públicu un documental qu’argumentaba estes duldes.

El documental preséntase asina:

“Esta ye la hestoria d’un pequeñu grupu de ciudadanos dirixíos por una güela de Seattle. Entamen esti viaxe pa responder a una sola entruga: ¿cómo fae américa pa cuntar los sus votos?. Lo qu’alcuentren ye secretismu, votos na basoria y maneres de cómo cambiar el cursu de la hestoria” .......

Nun te pierdas la folixa (1 payares, 19 h. CSOA La Reflexón)

2008-10-31T10:31:00.000+01:00

Charra: "La mocedá palestina baxo la ocupación sionista"

2008-10-07T13:23:00.002+02:00

Esti prósimu vienres, 10 d'Ochobre, va tener llugar nel local de Sestaferia una charra-debate sobre la situación de la mocedá palestina.

Entamará a les 6 de la tarde, y cuntaremos cola participación de:Juani Ruíz Sánchez, miembro de los Comités de Salú, y el su fíu, George Rismahwi, mozu palestinu que vivió hasta los 18 años nel guetu formáu pol muru sionista.

La entrada ye llibre.

GRAN FOLIXA HEREXE

2008-09-24T13:25:00.002+02:00

Esti sábadu, 27 setiembre, vamos cellebrar en Sestaferia l'éxitu de la primer campaña d'apostasíes colectives cellebrada n'Asturies.

Les solicitúes presentaes tán recibiendo contestación afirmativa, polo qu'unes 75 asturianes y asturianos dexaron nes últimes selmanes de "pertenecer" a la Ilesia Católica.

Y ye'l momentu de cellebralo, col siguiente programa d'actividaes previstes pal sábadu:

18 hores: Proyeición de la película "Así en el cielo como en la tierra"

20 hores: Llectura d'un manifiestu atéu.

20:15 hores: Folixa amenizada con rabelaes populares en vivo.

Táis convidaes toes y toos a cellebrar ésti éxitu con nós.

Sestaferia na Semana Negra

2008-07-16T18:31:00.002+02:00

Como los dos años anteriores, Sestaferia tien un puestíon na Semana Negra onde pues alcontrar les últimes novedaes de la nuesa distribuidora, garrar solicitudes para facer la apostasía o ponete en contactu con nos pa lo que seya.

Atopar el puestín de Sestaferia ye percenciellu. Tamos a la altura de la chimeneona de Poniente (que acuantayá perteneció a la Compañía de Maderas de Demetrio Fernández Castrillón), al llao de los bomberos y nuna carpa que compartimos col escritor mexicanu Fritz Glockner y la Fundación Federico Engles.

Campaña d´Apostasía Colectiva del Centru Social Sestaferia de Xixón (2º asaltu)

2008-07-03T20:27:00.001+02:00

Dempués de los impedimentos y trabes varies pa nun garrar les peticiones d´Apostasía que-y apurrimos al arzobispáu, tornamos a intentálo, esta vegada en grupu, y acompañaes por toes les que queráis apostatar y/o sofitar esta campaña.

El prósimu xueves 10 de xunetu, taremos na plaza la Corrada l´Obispu d´Uviéu, frente´l arzobispáu, dende les 11:00 la mañana, p’axuntar el mayor númberu posible d´apóstates y dir toes xuntes a presentar la nuesa baxa irrevocable na ilesia católica. A eso de les doce la mañana fadremos l´actu, pal que trataremos de cuntar cola presencia de medios de comunicación como la primer vegada. D´esta mena, llograremos el doble oxetivu d´esta campaña, borranos de la secta y criticar públicamente que nun estáu laicu como se supón que ye ésti, esista una relixón sofitada con perres públiques que tá permanentemente desbabayando. Tamos fartes de conferencia episcopal, cope, papas, cardenales y obispos....

Si yá nos enviaste la to petición d´apostasía, pónte en contautu con nos, nel Centru Social Sestaferia, pa venir el prósimu xueves 10 al arzobispáu y, si nun puedes, pa enviala por correu certificáu.

Si tás pensándolo o simplemente quiés saber cómo furrula esto, taremos frente´l arzobispáu con tó lo necesario p´apostatar, namás fai falta´l DNI y la voluntá firme d´abandonar el catolicismu y tolo que representa.

Comedor veganu

2008-06-17T01:33:00.002+02:00

Tres dellos díes de parón na actividá, vuelve'l movimientu a Sestaferia. Esti sábadu, 21 de Xunu, nueu comedor veganu.

A partir de les 2 y, como siempre, a preciu voluntariu.Dempués del comedor, a les 5, proyección del documental Earthlings, del que vos axuntamos un breve comentariu.

EARTHLINGS ye una película documental sobre la dependencia absoluta de la humanidá hacia los animales (como mascotes, alimentu, ropa, entretenimientu y análisis científicu) pero espeya tamién la nuestra total falta de respetu hacia ellos. La película tá narrada pol nomináu a un premiu de l’Academia Joaquin Phoenix (GLADIATOR) y lleva la música del aclamáu artista Moby.

Con un estudiu en profundidá sobre tiendes d’animales, criaderos y refuxos de animales, asina como les granxes factries, el mercáu del cueru y les pieles, les industries del entretenimientu y los deportes y finalmente la profesión científica y mélica. EARTHLINGS utiliza cámares escondíes y metraxe nunca vistu antes pa facer una crónica de les práctiques que día énte día empleguen dalgunes de les industries más grandes del mundiu, toes elles basades dafechu nel beneficiu que saquen de los animales.Poderosa, informativa y reflexiva, EARTHLINGS ye con muncho’l documental más comprensible nunca producíu sobre la rellación ente Ñatura, animales ya intereses económicos humanos.

Apostatamos.

2008-05-27T17:23:00.003+02:00

El prósimu llunes, 2 de Xunu, el Centru Social Sestaferia dará acabu a esta primer campaña d'apostasíes cola entrega na sede del Arzobispáu d'Uviéu de los formularios recoyíos hasta'l momentu. Sestaferia seguirá recoyendo estos formularios hasta'l vienres día 30.

Pa finalizar esta primer campaña, Sestaferia organiza dos actividaes lúdico-reivindicatives nos prósimos díes.

Esti xueves, día 29, vamos tener nel local del Centru (C/Numa Guilhou, 14, Xixón) a Carlos Alba "Cellero", que faerá un monólogu referente al tema, a partir de les 19:30 hores y con entrada llibre.

El vienres 30, y tamién de baldre, tendrá llugar nel Savoy Club (C/Pelayo, 2, Xixón) un conciertu del grupu xixonés de fusión-rock "Apostasía". El conciertu entamará a les 22 hores.

Comedor veganu

2008-05-21T08:56:00.002+02:00

Esti prósimu sábadu, día 24 Mayu, vamos cellebrar un nueu comedor veganu nel local de Sestaferia.

Esti comedor dará empiezu a les 2 de la tarde y, como siempre, constará de dos platos y postre. El preciu ye llibre, y los posibles beneficios d'esti comedor dirán destinaos al propiu mantenimientu autoxestionáu de l'actividá y a lluches y reivindicaciones que tán dándose n'Asturies.

Esperamos cuntar cola tu asistencia. Un saludu.

Presentación Llibrería Asociativa Sestaferia

2008-05-19T12:01:00.001+02:00

El Xueves y el Vienres tendreemos la xornaes de presentación del proyectu de Llibrería Asociativa de Sestaferia. Esta Llibrería Asociativa consistiría en que, si conseguimos un númberu determináu de socios/es, de los 10 euros mensuales de cuota que pagamos, 3 quedaríen pa un "fondu" personal. A final d'año cada sociu/a tendría 36 euros pa gastalos nos materiales que más-yos presten de la Distribuidora que tenemos nel Centru (camisetes, música, llibros, etc...). La cantidá d'euros puede variar en función del númberu de socios/es que consigamos al final de la campaña que tamos llevando alantre en Sestaferia pa conseguir que se xuna más xente al proyectu del Centru Social.

Dientro d'estes xornaes de presentación, vamos cuntar el xueves 22 cola xente d'Eguzki Bideoak, que vién tamién a presentanos el su proyectu. Será a les 19:30, con entrada llibre, como siempre, y proyectaráse un vídeu sobre Okupación realizáu por esti colectivu.

El vienres 23 doble actividá, rellacionada tamién cola Llibrería Asociativa. Tarán con nós la xente del Periódicu Diagonal, y de la Editorial Virus, que vendrán a presentanos tamién los sus proyectos. Y esi mesmu día 23, cenador popular, a les 22 h, con un preciu de 8 euros. Los beneficios d'esti cenador serán pa los gastos ocasionaos pol desplazamientu d'éstes persones (en dalgunos casos compartíos con Cambalache) y pal mantenimientu y gastos del local de Sestaferia. Esperamos cuntar cola vuestra presencia.

Xornaes "¿Qué-y tamos faciendo a África?" d'UAR Asturies. Proyeición de la película "Babel".

2008-04-27T23:52:00.001+02:00

El prósimu llunes, 28 d'Abril, proyectaráse nel CS Sestaferia la película "Babel", nel marcu de les Primeres Xornaes d'UAR Asturies, que consten nun ciclu de cine que lleva como títulu xeneral "¿Qué-y tamos faciendo a África?".

La proyeición entamará a les 6 de la tarde, y la entrada ye llibre.

Darréu ponémosvos una pequeña sinopsis de la película.

Nes llonxanes arenes del desiertu de Marruecos suena un disparu que desencadena una riestra d’acontecimientos fortuitos que va servir para conectar a una pareyja estauxunidense na su desesperada llucha por sobrevivir, colos dos mozos marroquinos responsables involuntarios del accidente, una niñera que crucia la frontera de Méxicu illegalmente con dos neños estauxunidenses y una adolescente xaponesa sorda y rebelde sobre cuyu padre pesa una orde de busca y captura. Pesie a les enormes distancies y de les cultures tan antagóniques que los separten, estos cuatro grupos de persones comparten un destín d’aisllamientu y dolor. Namái bastarán unos pocos díes pa que s’alcuentren perdíos dafechu, perdíos nel desiertu, perdíos pal mundiu, perdíos pa sigo mesmos, mientres avancen hacia’l borde del abismu de la confusión y el mieu, al tiempu que se funden nes profundidaes de les rellaciones y del amor.

Comedor veganu.

2008-04-23T08:35:00.002+02:00

Esti sábadu, día 26 d’Abril, a partir de les 14 hores, habrá un nueu comedor veganu nel local, organizáu en collaboración cola Asociación Escanda y persones a títulu individual. Como siempre, el preciu del comedor ye llibre, asina que vosotres y vosotros decidís cuánto podéis y queréis aportar pa sufragar los gastos d'esti comedor.

Alcordáivos de traer l'aceite que tengáis usáu por casa, pa que puedan usalu los y les compañeres d'Escanda pa facer que se mueva la su furgoneta. Nun importa la calidá y el grosor d'esti aceite, yá que se ocupen n'Escanda de filtralu y facer tolos procesos necesarios pa poder usalu como combustible.

Xornaes "¿Qué-y tamos faciendo a África"? d'UAR Asturies. Proyeición de la película "El jardinero fiel".

2008-04-20T21:34:00.001+02:00

El prósimu llunes, 21 d'Abril, proyectaráse nel CS Sestaferia la película "El jardinero fiel", nel marcu de les Primeres Xornaes d'UAR Asturies, que consten nun ciclu de cine que lleva como títulu xeneral "¿Qué-y tamos faciendo a África?".

La proyeición entamará a les 6 de la tarde, y la entrada ye llibre.

Darréu ponémosvos una pequeña sinopsis de la película.

Nun remotu lugar al norte de Kenya, asesinen brutalmente a l’activista más entregada de la zona, la brillante y apasionada Tessa Quayle (Rachel Weisz). Un mélicu local que l’acompañaba fuxe y too paez indicar que ye un crimen pasional. Sandy Woodrow (Danny Huston), Sir Bernard Pellegrin (Bill Nighy) y los demás miembros del Altu Comisionáu Británicu tán convencíos de que’l viudu de Tessa, l’apacible y poco ambiciosu Justin Quayle (Ralph Fiennes) va dexar l’asuntu nes sus manes, pero tán mui equivocaos. L’equilibriu profesional del diplomáticu basculó al perder a la muyer a la que tanto amaba. Esos dos seres tan opuestos atraíense mutuamente y esfrutaben d’un feliz matrimoniu. Los recuerdos d’esa xunión emburrien a Justin a garrar una determín por primer vez na su vida personal y profesional. Perseguíu polos remordimientos y feríu por los ruxe-ruxes de les supuestes infidelidaes de la su muyer, Justin sorpréndese a sigo mesmu llanzándose a una peligrosa odisea. Decidió llimpiar el bon nome de la su muyer y "acabar lo qu’ella entamó". Pa consiguilo, habrá deprender a marches forciaes cómo furrula la industria farmacéutica, yá que Tessa taba a piques de descubrir un escándalu, y viaxará per dos continentes en busca de la verdá. Nun va tardar en dasse cuenta de la esistencia d’una conspiración tan lletal como común que yá cobró la vida d’inocentes y pondrá la suya en pelligru.

Conciertu en sofitu a Sestaferia nel Oremus

2008-04-19T13:32:00.002+02:00

Esta nuechi a les 21 hores, nel Bar Oremus (C/Institutu, 18, Xixón) conciertu del grupu Jer Flatulens en sofitu al CS Sestaferia. Esti grupu ye'l que taba tocando cuando se personó la policía municipal y hubo de suspendese la folixa, en sofitu a les lluches sociales en Colombia, que tábemos llevando a cabu nel centru. Pues agora'l grupu fae una folixa en sofitu nuestru por decisión propia, cosa que ye mui d'agradecer.

La entrada ye de baldre, y el grupu va rifar dalgunes coses sorpresa pa dar les perres recaudaes con esa rifa al Centru Social.

Pola tarde, proyección en Sestaferia de la película El Odio (La Haine). Sedrá a les 18 hores.

Charra sobre la regasificadora d'El Musel

2008-04-16T08:41:00.003+02:00

Esti prósimu vienres, 18 d'abril, va tener llugar nel local de Sestaferia, a les 20h., una charra sobre la futura Regasificadora d'El Musel.

La charra, que tará acompañada de la proyeición de gráficos y semeyes, correrá a cargu de miembros de la plataforma ciudadana "Regasificadora NON!", na que tá enxertada, amás d'una montonera de colectivos y asociaciones, el Centru Social Sestaferia.

N'acabando la charra, habrá un pinchéu tamién nel local, y que tendrá un preciu llibre y voluntariu. Tolos fondos recaudaos van destinaos a esta plataforma ciudadana.

Xornaes "¿Qué-y tamos faciendo a África"? d'UAR Asturies. Proyeición de la película "El último rey de Escocia".

2008-04-11T22:34:00.002+02:00

El prósimu llunes, 14 d'Abril, proyectaráse nel CS Sestaferia la película "El último rey de Escocia", nel marcu de les Primeres Xornaes d'UAR Asturies, que consten nun ciclu de cine que lleva como títulu xeneral "¿Qué-y tamos faciendo a África?".

La proyeición entamará a les 6 de la tarde, y la entrada ye llibre.

Darréu ponémosvos una pequeña sinopsis de la película.

EL ÚLTIMO REY DE ESCOCIA

Per una increíble pirueta del destín, un mélicu escocés (James McAvoy) destacáu en misión mélica n’Uganda queda inreversiblemente enredáu con ún de los personaxes más bárbaros del mundiu: Idi Amin (Forest Whitaker). Impresionáu pola descarada actitú del doctor Garrigan nun momentu de crisis, el recién autonomáu presidente d’Uganda, Amin, elíxely como mélicu personal y como’l su confidente más íntimu. Anque Garrigan siéntese al principiu afalagáu y fascináu pol su nueu puestu, nun tarden n’abríse-y los güeyos al xabazismu d’Amin y a la su propia complicidá n’él. L’horror y la traición persiguen a Garrigan cuando intenta enmendar los sus errores y fuxir con vida d’Uganda.

Prolongación campaña apostasía

2008-03-31T21:38:00.004+02:00

Col gran númberu de formularios que tan llegando a Sestaferia, la entrega de toos pospónese al llunes 2 de Xunu nel Arzobispáu d'Uviéu. Tres díes enantes, el vienres 30 de Mayu, se fae un pasucáis y un conciertu de presentación en Xixón.

Con el gran número de formularios que están llegando a Sestaferia, la entrega de todos se pospone al lunes 2 de junio en el Arzobispado de Oviedo. Tres días antes, el viernes 30 de mayo, se hace un pasacalles y un concierto de presentación en Xixón.

Apostasía colectiva

2008-03-25T16:14:00.007+01:00

Sestaferia entama una campaña d'apostasía colectiva. ¿Quiés que los tos datos nun figuren nos ficheros de la Iglesia Católica? Ye perfácil. Solo ties que rellenar los dos documentos d'embaxu y traernoslos al local (Numa Guilhou 14, baxu, en Xixón) o unviárnoslos por correo (el código postal ye el 33206). Sestaferia faerá la entrega de toos el prósimu 2 de Xunu. Si quies sofitar la campaña, déxanos dos sellos de correos con la to solicitud.

Sestaferia comienza una campaña de apostasía colectiva. ¿Quieres que tus datos dejen de figurar en los ficheros de la Iglesia Católica? Es muy sencillo. Solo tienes que rellenar los documentos de abajo y traérnoslos al local (Numa Guilhou 14, bajo, en Xixón), o enviárnoslos por correo (el código postal es el 33206). Sestafería hará la entrega de todos el próximo 2 de junio. Si quieres apoyar la campaña, déjanos dos sellos de correos con tu solicitud.

Descarga los pdf y hazlos llegar a Sestaferia para la entrega colectiva. Ádjunta también dos fotocopias del to DNI.

Descarga los pdf y faelos llegar a Sestaferia pa la entrega colectiva. Apurri tamién dos fotocopias del to DNI.

Modelo para el arzobispado
Modelu pal arzobispáu

Modelo para la parroquia
Modelu pa la parroquia

Comedor veganu.

2008-03-13T09:40:00.002+01:00

Esti sábadu, día 15 de Marzu, a partir de les 14 hores nel local, habrá un nueu comedor veganu organizáu en collaboración cola Asociación Escanda. Como siempre, el preciu del comedor ye llibre, asina que vosotres y vosotros decidís cuánto podéis y queréis aportar pa sufragar los gastos d'esti comedor.

Los y les compañeres d'Escanda comenten tamién que dempués de la comida, a eso de les 4 la tarde, van facer una asamblea con xente interesao en participar nesti proyectu de comedores veganos, yá que dellos/es miembres d'esi colectivu tienen que dexar el mesmu temporalmente, y busquen xente interesao en xunise.

Alcordáivos de traer l'aceite que tengáis usáu por casa, pa que puedan usalu los y les compañeres d'Escanda pa facer que se mueva la su furgoneta. Nun importa la calidá y el grosor d'esti aceite, yá que se ocupen n'Escanda de filtralu y facer tolos procesos necesarios pa poder usalu como combustible.

Proyeición de "La cuadrilla"

2008-02-06T00:03:00.000+01:00

Xueves 7 de febreru, 19:30 hores

Proyeición, dientru del ciclu "Cine y Mundu Llaboral" de la película "La cuadrilla". La entrada ye llibre.

Un grupu d’operarios de la British Rail, la empresa estatal británica de fierrucarriles, cuyu trabayu consiste na igüa de víes de tren, al sur de la rexón de York, pasa a una nueva situación llaboral por causa de la privatización de la mesma. Les sos condiciones de trabayu, asina, cambien sinificativamente: se-yos pagará por trabayu realizáu, vacances non retribuyíes, etc. O acepten les nueves condiciones llaborales o habrán d’optar por una indemnización, siendo despedíos, pasando a "buscase la vida" ente les ETTs.

Con ello entama la descomposición del grupu, inicialmente mui cohesionáu, provisto d’una gran conciencia profesional, y que tresmite la esistencia ente ellos d’una buena amistá.

El sindicalismu clásicu, encarnáu na figura d’un veteranu trabayador, nun ye quién a asimilar los cambios, siendo l’últimu empleáu de la empresa que permanez na mesma, ensin facer nada, a la espera del cierre. Simboliza, d’esa manera, la creciente incapacidá de los sindicatos británicos p’afrontar la nueva realidá.

Les condiciones llaborales dirán degradándose, progresivamente, hasta’l puntu de que, en manes yá d’una ETT, les midíes de seguridá, ún de los llogros hestóricos del sector, son ignoraos n’ares d’una puntual finalización del trabayu, inda col riesgu d’un fatal accidente que casi s’adivina… D’esta forma, la película conviértese nuna contundente denuncia social de la creciente precariedá de les condiciones llaborales que vienen imponiéndose, non sólo en Gran Bretaña, sintetizada na siguiente fras d’ún de los nuevos directivos de la empresa, quien afirma que "el contratu fixu ye’l pasáu, hai que mirar al futuru".

Los sos actores (Joe Duttine, Tom Craig, Venn Tracey, Andy Swallow, Dean Andrews), poco conocíos, actúen con una gran naturalidá, vitalidá, y un acusáu sintíu del humor; buena espresión de la camaradería vivía pol grupu nel que, idealmente, s’inspira. Rodada en Sheffield (Inglaterra), la película tién una factura casi de documental. Dalgunos retazos de les vides privaes de los sos protagonistes asomen a la gran pantalla. Colos afectos descompuestos, separtaos de les sos families en crisis y con unos horizontes vitales mui llimitaos, la pista de xelu, na que dos de los sos protagonistes patinen por breves instantes y en distintos momentos de la narración, encarna la posibilidá del reencuentru afectivu y d’una vida meyor.

Mesa Redonda Precariedá Llaboral

2008-01-22T00:36:00.000+01:00

Esti prósimu sábadu, 26 de xineru, tendrá llugar nel local del CS Sestaferia una Mesa Redonda sobre mocedá y precariedá llaboral, dientru de les Xornaes que cada añu convoca l'Aula Popular García Rúa.

L'actu, que entamará a les 7:30, contará cola participación de Josele, abogáu llaboralista, con un trabayador de Duro Felguera represaliáu pola empresa recientemente, y con miembros del Comité de Fuelga de Metro Madrid, que vivió recientemente un conflictu llaboral por toos y toes conocíu. Dempués d'una breve introducción al tema de la Precariedá Llaboral y la regresión de derechos que sufrimos nesi campu, abriráse un turnu abiertu d'intervenciones ente toos y toes les asistentes, baxo l'epígrafe "Cómo enfrentanos a la situación llaboral d'anguañu".

El meyor regalu en Sestaferia

2007-12-21T19:39:00.000+01:00

Dende esta selmana hay delles novedaes más na distri de Sestaferia. ¿Quies facer un regalu combativu? Equí ties dalguna recomendación:

CD's
Irun Zion Lion in Dub (compilatoriu grupos vascos) - 11 €
Manu Chao - La Radiolina - 17 €
Anabel Santiago - Desnuda - 14 €
Ensín Cadenes (compilatoriu sofitu Xorrecer) - 5 €
Blima - Entamu - 12 €
Tutu Studiu 07 - 12 €
Soncai System - Clashturies - 12 €

DVD's
Fermín Muguruza - Afro Basque Fire Brigade Tour 2007 - 18 €
A ras de suelo - 10 €
Laboratorio 03: Okupando el vacío - 10 €
El violento oficio de la historia - 10 €

LLIBROS
Las luchas de los sin papeles - 16 €
El movimiento del '77 - 10 €
Vallekas, puerto de mar - 15 €
Palestina. Textos antisionistas - 6 €
Solidaridad obrera y el periodismo ácrata - 15 €
La huelga de la construcciñon en Asturias - 20,80 €
King Mob. Nosotros, el partido del diablo - 12 €
Impresiones de un viaje por España en tiempos de revolución - 18 €
Memorias de un señor bajito - 11 €
¿Por qué he robado y otros textos? - 13 €
El anarcosindicalismo español. Una historia en imágenes - 12 €
Contratos temporales y precariedad - 7 €
El anarquismo individualista en España - 20 €
Estado de wonderbra - 18 €
Orden público - 13 €
Huye, hombre, huye - 12 €
Madrid. ¿La suma de todos? - 24 €
Gastu Militarra - 2 €
Acercarse a Carlos Marx - 6 €
¿Quién habla? La exclavitud en los Call Centres - 12 €

REVISTES
Malababa nº 2
Prótesis nº 1

CONCIERTU SKA, XUEVES 20 D'AVIENTU

2007-12-18T10:35:00.000+01:00

Esti prósimu xueves, 20 d'avientu, el CS Sestaferia, xunto a Xunca Records, organiza una pequeña folixuca na sala Bola 8 (C/Remedios, 11, Cimavilla, Xixón), que tendrá como platu fuerte'l conciertu que dende les 20:30 hores darán los grupos Fala Non Caduca, formáu por xente permozo d'Asturies que nos deleitarán colos sos temes frescos y combativos, y la formación italiana de ska combativu Talco, que tarán tocando por vez primera n'Asturies. El preciu del conciertu será de 7 euros.

Dempués seguiremos echando unes rises y unos bailles, pero esta vez con música "enllatao".

Nun podéis faltar, va ser la fiesta más animada no que queda d'añu.... ¡de xuru!

Por último, recordavos que los beneficios que se saquen del conciertu van dir destinaos al mantenimientu del local de Sestaferia.

Afayaivos!!

2007-10-04T02:08:00.000+02:00

Entama equí el blog de Sestaferia. Guárdanos en favoritos y sedrás el primeru en enterarte de charres, proyecciones, conceyos, folixes y delles actividaes más del to centru autoxestionáu.